Nú í aðdraganda páska eru að verða liðnar þrjár vikur frá því að takmarkanir við samkomuhaldi voru fyrst settar og hefur það haft margvísleg áhrif, bæði á starfsemi sveitarfélagsins, rekstur fyrirtækja og daglegt líf íbúa. Þegar þetta er ritað hefur ekkert smit greinst, enn sem komið er, í Bláskógabyggð. Nokkrir íbúar hafa farið í sóttkví og líklegt er að eitthvað sé um að einstaklingar sem eru í sóttkví dvelji í sumarhúsum á svæðinu.
Mikið hefur reynt á starfsfólk leik- og grunnskóla við að halda úti starfsemi og taka jafnframt tillit til stífra reglna og tilmæla um fjarlægð á milli nemenda, sem oft er erfitt að uppfylla, einkum þegar ung börn eiga í hlut. Mikil framþróun hefur orðið í fjarnámi og eflaust mun til framtíðar verða að einhverju marki horft til þess að nýta tæknina enn frekar en venjan er. Starfsfólki eru færðar þakkir fyrir að halda sjó í erfiðum og krefjandi aðstæðum og jafnframt er íbúum þakkað fyrir að sýna því skilning að ekki eru allir hlutir eins og þeir voru. Mikið hefur eflaust mætt á mörgum foreldrum við aðstoð við heimanám og að reyna að sinna vinnu með takmarkaða þjónustu t.d. á leikskólum. Áfram má gera ráð fyrir að starfsemi verði víða skert, en þess er að vænta að fljótlega verði tilkynnt hvernig staðið verði að tilslökunum.
Í venjulegu árferði hefðu íbúar og rekstraraðilar í Bláskógabyggð fagnað straumi gesta í sumarhús og á ferðamannastaði um páskana, enda er ferðaþjónustan einn mikilvægasti hlekkurinn í atvinnustarfsemi á svæðinu. Nú er staðan sú að landsmenn eru beðnir að halda sig heima og örfáir erlendir ferðamenn eru á landinu. Eru þetta mikil viðbrigði og afar sérstakt að vera í þeirri stöðu að óska þess að sem fæstir komi. Tilmæli þessi voru ekki sett fram að ástæðulausu, mikið mæðir á heilbrigðiskerfinu hér á Suðurlandi þegar gestkvæmt er, auk þess sem hætta er á að smit sé borið á milli þegar mikil fjöldi fólks kemur saman eða sækir þjónustu. Nokkuð bar á því að of margir söfnuðust saman t.d. við Gullfoss og Geysi, og hefur Umhverfisstofnun nú sett upp merkingar þar sem fólk er minnt á reglur um fjarlægðarmörk.
Sveitarstjórn hefur þegar samþykkt tilslökun varðandi innheimtu fasteignagjalda hjá rekstraraðilum sem verða fyrir tekjutapi af völdum Covid-19, en eflaust eru það nánast öll fyrirtæki innan sveitarfélagsins sem verða fyrir áhrifum af þessu ástandi. Nánari útfærsla á greiðslu fasteignagjalda verður kynnt eftir fund sveitarstjórnar sem haldinn verður 16. apríl n.k. Ljóst er að útsvarstekjur sveitarfélagsins munu dragast saman, þar sem atvinnuleysi er þegar talsvert og margir komnir í skert starfshlutfall. Þrátt fyrir það verður leitast við að framfylgja gildandi áætlun um fjárfestingar í sveitarfélaginu, að fjárhæð tæplega 300 milljónir króna, og skoðað sérstaklega hvort hægt sé að flýta einhverjum framkvæmdum sem áætlað var að ráðast í á næstu árum.
Þrátt fyrir erfiða stöðu er mikilvægt að tapa ekki bjartsýninni og leita leiða til að komast upp úr þessum öldudal. Megi páskarnir vera ykkur ánægjulegir og endurnærandi.
- apríl 2020
Gleðilega páska,
Ásta Stefánsdóttir, sveitarstjóri
