Nýr gistiskáli í Bláskógabyggð

Nýr gistiskáli sem hjónin Vilborg Guðmundsdóttir og Loftur Jónasson í Myrkholti í Bláskógabyggð hafa byggt var formlega tekið í notkun laugardaginn 18.apríl. Það hefur hlotið nafnið Skálinn. Fjölmenni var við opnun hússins. Séra Sigurður Sigurðarson biskup í Skálholti flutti hugvekju og blessaði húsið. Byrjað var að byggja húsið í ágúst í fyrra en þau hjón hafa að mestu leyti unnið að byggingarvinnunni sjálf með annarri vinnu. Húsið sem er byggt úr timbri er 285 fm. Í húsinu eru 8 fjögurra manna herbergi, 100 fm. salur, góð eldunaraðstaða og baðherbergi eru rúmgóð. Gistiaðstaðan verður leigð út sem svefnpokapláss og gestir geta eldað sjálfir en tvær eldavélar eru í eldhúsinu. Skálinn verður opin allt árið.  Húsið er staðsett skammt frá Gullfossvegi. Þarna er boðið upp á góða aðstöðu, m.a fyrir hestamenn, en reiðleiðir eru góðar og greiðar við hálendisbrúnina. Nú þegar hefur verið pantað allnokkuð fyrir hestahópa í Skálanum. Það er vart hægt að lýsa umhverfinu og hófinu betur en Jón Karlsson í Gýgjarhólskoti  skrifaði á servíettu við hlið ljósmyndara í opnunarhófinu. Hótel Myrkholt hlýtt og bjart hrekur alla skugga. Fögur sýn og fjallaskart fæst úr hverjum glugga. Hérna glymja gamanmál gleðiraddir hljóma. Drekkum nú í Skála skál skörungum til sóma. www.gljasteinn.is gljasteinn@gljasteinn.is