Hvítárbrú. Brúarvígsla föstudaginn 9. september 2011

Brúarvígsla og stefnumót sveitunga Föstudaginn 9. september munu vegamálastjóri og innanríkisráðherra standa fyrir formlegri vígslu á Hvítárbrú og verður klippt á borðann klukkan 15:00. Í tilefni af þessum merkisviðburði ætla heimamenn beggja vegna brúarinnar að gera sér glaðan dag og hittast. Íbúar í Hrunamannahreppi og Bláskógabyggð eru hvattir til að ganga á móti hver öðrum og mætast á brúnni. Kvenfélagskonur munu klæðast þjóðbúningum og eru allar konur sem þá eiga hvattar til að mæta uppábúnar. Félagar í Karlakór Hreppamanna taka lagið á brúnni að lokinni vígslu. Sveitungar eru hvattir til að taka þátt og koma að brúnni gangandi, skokkandi,  ríðandi eða jafnvel á gömlum bílum. Á eftir er upplagt að  heimsækja vini í nágrannasveit eða bregða sér á næsta veitingastað þar sem án efa verða brúartilboð í tilefni dagsins. Brúarhlaup Í tilefni dagsins verður boðið upp á ?Brúarskokk? fyrir börn.  Ræst verður  kl. 14.15 á  tveimur  stöðum, annars vegar í Hrunamannahreppi og hins vegar í Biskupstungum og skokkað að brúnni á undan vígslunni. Þetta verður stutt skemmtiskokk og þeir sem hafa áhuga á að hlaupa mæta einfaldlega á staðinn. Hlaupið verður ræst á tveimur stöðum í einu, í fyrsta lagi við afleggjarann við Galtalæk og í öðru lagi við hringtorgið á Flúðum. Lengd hlaupsins er 2,1 km. en endað verður á miðri brú. Allir sem áhuga hafa á að taka þátt í hlaupinu þurfa að mæta kl 14:00 við afleggjarann á Galtalæk og við hringtorgið á Flúðum. Hlaupið verður ræst kl. 14:15. Vonast til að sem flestir komi og taki þátt í hlaupinu. Veitt verða verðlaun fyrir þátttökuna. Ef einhverjar spurningar vakna er um að gera að hafa samband. Helgi Kjartansson og Árni Hilmarsson Með kveðju Atvinnu- ferða- og menningarmálnefndir Hrunamannahrepps og Bláskógabyggðar, Kvenfélög og Ungmennafélög Biskupstungna og Hrunamanna. Björgunarsveitirnar beggja vegna brúar og ferðamálafulltrúi.