Forseti Íslands, Guðni Th. Jóhannesson, og Eliza Reid, forsetafrú, koma í opinbera heimsókn í Bláskógabyggð föstudaginn 9. júní n.k. Heimsókn forsetahjónanna er í tilefni af 15 ára afmælis Bláskógabyggðar. Forsetahjónin munu fara vítt og breitt um sveitarfélagið, þau munu m.a. koma við á Þingvöllum, Laugarvatni, Laugarrási og Reykholti. Þá munu þau heimsækja Laugarvatnshella og kúabú.
Á þessum tímamótum mun Bláskógabyggð skrifa undir samning um Heilsueflandi samfélag við Embætti landlæknis. Óttarr Proppé, heilbrigðisráðherra, mun mæta í Heilsugæsluna í Laugarási þar sem undirritunin fer fram og ávarpa samkomuna.
Heimsókn forsetahjónanna mun ljúka í félagsheimilinu Aratungu en þar verður opið hús fyrir íbúa og gesti frá kl. 16:00-18:00.
Dagskrá:
- Selbrúnir (rétt við afleggjara að Grafningsvegi), 8:45
Sveitarstjórn, sveitarstjóri og makar taka á móti Guðna Th. Jóhannessyni, forseta Íslands og frú Elizu Reid á Selbrúnum, Þingvallasveit.
- Þingvellir, 9:00-9:30
Ólafur Örn Haraldsson þjóðgarðsvörður, Vilhjálmur Árnason, formaður Þingvallanefndar og Einar Á. Sæmundsen taka á móti forsetahjónunum við Hakið.
- Laugarvatnshellar, 9:50-10:10
Smári Stefánsson og Hallbera Gunnarsdóttir taka á móti gestum. Þau segja forsetahjónunum frá því þegar búið var í Laugarvatnshellum en þau hafa endurgert hellana eins og þeir voru þegar búið var í þeim.
- Laugarvatn, 10:30-11:30
Heimsókn í Héraðsskólann á Laugarvatni og þaðan verður farið í Fontana.
- Hjálmsstaðir, 13:00-13:20
Daníel Pálsson og Ragnhildur Sævarsdóttir bændur á Hjálmsstöðum taka á móti forsetahjónunum og sýna þeim nýtt fjós sem þau hafa byggt upp.
- Heilsugæslan í Laugarási, 13:50-14:50
Skrifað verður undir samning um heilsueflandi samfélag milli Bláskógabyggðar og Embættis landlæknis. Óttarr Proppé heilbrigðisráðherra mun mæta og ávarpa samkomuna ásamt forseta Íslands.
- Friðheimar, 15:00-15:30
Knútur Ármann og Helena Hermundardóttir taka á móti hópnum og segja frá sinni starfsemi og garðyrkju í sveitarfélaginu.
- Aratunga, 16:00-18:00
Móttaka í Aratungu fyrir íbúa og gesti sveitarfélagsins. Forsetinn mun flytja ávarp. Á dagskránni eru m.a. tónlistaratriði og landsfrægur skemmtikraftur.
